Ke Mele a me ke Kaona o ia Mele i Haku ‘Ia: Noho nō i Puna ka Nani me ka Maika‘i

Kīlau Pali
October 1922

This story appears in the October 19, 1922 edition of the Hawaiian language newspaper Kuokoa and explains the circumstances behind the composition of “Noho nō i Puna ka Nani me ka Maikaʻi,” the mele hoʻāeae with which the story begins. To summarize: a young man and woman of Puna, Hawaiʻi, fall in love and live together as man and wife. In time, another young man arrives from Hilo; he befriends the couple, and they accept him into a punalua relationship. The stranger’s lively and industrious behavior endears him to the woman’s enfeebled father whose constant complaining about his first son-in-law eventually sours the relationship and drives away this patient, forgiving, and now heart-broken hūnōna kāne. The young man travels to Honolulu where, in the marketplace at ʻUlakoheo, he meets and hires an expert at hoʻāeae (mele that are expressive of powerful emotions; mele that are delivered in a distinctive two-line style that features a holding-out of vowel sounds, usually at the end of the second line of each couplet). Kū, the chant master, agrees to teach the young man to oli; he also agrees to compose for him a mele hoʻāeae guaranteed to win back the heart of his estranged wife. All that Kū promises comes to pass: the young man returns home with “Noho nō i Puna,” and his soulful chanting of the mele is, indeed, the “lāʻau puhipuhi” by which her love is re-ignited. “Mamuli o kēia mele i hoʻi hou ai kēia mau mea a noho he kāne a wahine, a hiki i ka uhi ʻana o kapa ʻeleʻele . . .” Because of this mele, the two live again as husband and wife, and they remain so until covered by the black shroud of death.

The story is well-told and certainly worth reading for the simple enjoyment of plot, character, and language. It is also of considerable interest to students of the hoʻāeae: it gives the chant-form a specific social and historical context; it offers a glimpse into the manner in which the skills of a 19th century master chanter were displayed and his services engaged; it details the often-stated but under-illustrated Hawaiian belief in the power of words (especially the power of carefully selected and delivered words); and it encourages a redefinition of the hoʻāeae as a distinct genre of poetry - and not simply as a set of vocal qualities with which an oli is delivered.

We have, to the best of our ability, provided orthographic editing for the Kuokoa’s original text. In some cases, we have left this text unaltered in deference to what might be termed the "meaningful ambiguity" of certain unmarked words and phrases. We’ve left other passages unaltered in recognition of our inability to properly understand them. The reader is encouraged to form his own conclusions by viewing the original "Ke Mele a me ke Kaona o ia Mele i Haku ʻIa" at Ulukau: The Hawaiian Electronic Library. Readers unfamiliar with the sound of hoʻāeae are directed to Kalani Akana’s rendition of "Mele Hoʻoipoipo" on the CD Nā Kumu Hula, Songs From the Source v.1, SCHH CD-7100. This mele is, in fact, "Kuʻu wahine i ke kula loa lā o Kahuʻa / Mai ka ua liʻiliʻi lā o Mānoa"—the hoʻāeae whose text appears near the conclusion of the story below.

Noho nō i Puna ka nani me ka maikaʻi,

He hale kipa ia na ke ʻala me ke onaona,

Onaona ka maile ka hala o Keaʻau,

Aloha ai nō ke kupu o Kaniahiku.

Kū maila ka ua o Nahunahu kiʻekiʻe i luna,

Hoʻokakano lua i ka laʻi o Wahinekapu,

Puapuaʻi maila nā leo ʻawahia a ka manu,

Nā kauna ʻōlelo a ka Puʻulena i ka uka,

Kakaʻo ka waha o ka ua Nahua i kanahele,

I ka ʻī mai nō ua lilo o ʻŌmaʻolala iā Panaʻewa,

He aha nō ka hewa ke ʻai ʻia kaʻu hakina,

He poʻo maunu ia naʻu i ʻai a kau i ka lāʻau,

Ua pau maila i ka makapehu o ka uka,

Ia kini noho nahele noho pōloli o Laʻa,

Manaʻo aʻe ke ola i ka hakina pua ʻai a ka manu,

He koena ia na ka Nāulu i ʻai a haʻalele,

Ke pane mai lā, e hoʻāʻā, ke kona waianuhea,

Peulaka ʻū ka hau anu a ka Waiʻapo,

ʻO kaʻu hana akamai loa ia ʻo ke kōnane,

He helu ʻekahi au i ka pūlapu i lono ʻoe,

ʻO ʻoe nō ka ʻole he māʻukaʻuka ʻeʻepakēkē,

He sela ʻoe no mua he huki kaula kāu hana,

He pulumi ʻoneki ʻoe no ka papahele.

ʻO wau mai nō ka haku ka ʻona o koʻu waiwai,

A he wahi aloha, no Puia,

I ke onaona ka paia o Puna.

ʻO kēia mele ma luna aʻe, ua haku ʻia e kekahi mea ʻokoʻa, a he ʻōlohe haku mele paha ka ʻōlelo āna.

Aia i ka ʻāina paia ʻaʻala i ka hala o Puna, i Hawaiʻi, e noho ana kekahi keiki me kona mau mākua i ka ʻāina i pana ʻia ka inoa ʻo Makuʻu, a ʻoiai ua ʻōpuʻu ke kākala o ka moa ʻōpio i kēia mau lā, no laila ua mākaukau nō ka lawaiʻa huki ulua o ka makalae.

I kekahi lā, ua ʻike akula ʻo ia i kekahi kaikamahine ʻōpio helehelena maʻemaʻe, ua hihia ihola ka ʻīkoi o kona puʻuwai i ka hoʻohihi i kēia uʻi, ʻaʻole naʻe ʻo ia wale nō kai loaʻa ia haʻawina, akā o kēlā uʻi pū nō kekahi, a i loko o ia hauli lele a ka manaʻo, ua huikau aʻela nā lāʻau ihu o ka moku Kahiki, a hoʻopaʻa akula ka laina o hope i ka niu moe o Kalapana.

Iā lāua i noho aʻe ai he kāne a he wahine, ua lilo ia i mea ʻoluʻolu i ko lāua manaʻo, a pēlā nō hoʻi me ka ʻohana o nā ʻaoʻao ʻelua.

Mamuli o ke ʻonawaliwali o ka makuahōnōwai kāne, ua hoʻi akula nā keiki a noho me ia mau mākua.

Eia kēia manawa o ka ʻāina i nā lā o ke ʻō koholā, a i kaulana hoʻi ka poʻe holokahiki, e kū ana nā moku i Hilo, Lahaina a me Honolulu nei.

I kekahi lā, ua hiki akula kekahi huakaʻi hele i Puna, a i loko o ia huakaʻi kekahi keiki, ua noho ihola kēia poʻe i Puna no kekahi mau lā.

I kēia noho ʻana, ua hoʻaikāne ihola kēia keiki malihini, me ke keiki kamaʻāina o Makuʻu, nāna ka wahine a noho ihola lākou me ka maikaʻi. ʻO kēia keiki malihini he mikimiki ʻo ia, a e hana ana i nā hana āpau, a mamuli o ia kūlana ʻeleu, ua lilo ia i mea e punahele ai i ka makua kāne o ka lāua wahine.

I kekahi manawa hele pū nō kēia keiki kamaʻāina me ke aikāne i waena mahi ʻai, a i kekahi manawa hele kēia keiki kamaʻāina i ka lawaiʻa.

Iā ia e hoʻi mai ai mai ka lawaiʻa mai, a no ka mania i ke kai, ke pau nō ka ʻai ʻana, hāʻule nō hiamoe.

Mamuli o ia hana a ka hūnōna, ua lilo ia i mea e hoʻowahawaha loa ai o kēia makuahōnōwai kāne i ka hūnōna.

I kekahi lā ʻōlelo akula ka makuakāne i ke kaikamahine: "Ikaika nō hoʻi ke aikāne a ʻolua i ka mahi ʻai, ola wale ka noho ʻana o ke kāne kēia, inā nō hoʻi paha pēlā ko kāne a kāua e noho nei, ʻo ka lawaiʻa nō a hoʻi mai, he hiamoe ka hana o ka lā.

Mamuli paha o kēia mau ʻōlelo a ka makua, ua hihia ʻiʻo kēia uʻi o Puna me ke aikāne a kāna kāne, aiʻole ia ua lou mua aku nō paha ka nīʻau niu o Kalapana i ka malihini, hoʻohua hoʻi kēia ʻōlelo a ka makua:

Pā iho iā Kīnaʻu,

Waiʻolu wale ka manaʻo;

Me he ua liʻiliʻi lā.

ʻO ka pā a ke Kona ē,

A ka makani ikaika.

Na ia mau ʻōlelo paha a ka makua i hoʻonanākoʻi loa aʻe i ka manaʻo o kēia kaikamahine.

Ia wā nō hoʻi e panepane kū mau ana nō hoʻi kēia makuahōnōwai kāne, me ke ʻano ʻaʻaka i ka hūnōna.

Me ia ʻike nō naʻe o kēia hūnōna i ka hana a ka makua kāne o kāna wahine, ʻaʻole ia he mea nona e ʻihaʻiha ai o kona manaʻo; mai kona wā ʻike ʻole, a hiki i kona ʻike ʻana i nā hana a ka wahine me ke aikāne; ʻo ka hopena, ua kāʻili aʻela ke aikāne i ka wahine a lāua a lilo loa iā ia.

I kekahi lā āna i hoʻi aku ai i ka hale, ua hoʻopuka maila ua aikāne nei i nā ʻōlelo ʻawaʻawa i ka ʻī ʻana mai:

"Kū ʻoe a hele mai kēia hale aku, ʻaʻole āu wahine o ʻoneʻi, me aʻu kēia wahine a hoʻoluʻolu."

ʻO ka makua kāne o ka wahine kekahi i kōkua ma hope o kēia hūnōna hou, a no ka nui o nā ʻōlelo ʻehaʻeha i pane ʻia mai i mua o kona alo, ua hilahila ʻo ia, a haʻalele akula i ka hale o ka wahine.

ʻO kahi i noho ai o kēia ʻohana, aia i kula aku, ʻaʻole i kahakai.

He aikāne nō hoʻi kā kēia kaikamahine, aia i kahakai kahi i noho ai me kāna kāne; ua hoʻi akula kēia kāne a ke aikāne a noho pū me lāua; eia naʻe e uē mau ana ke kāne i ke aloha i ka wahine, a mamuli o ia uluʻā o kona noʻonoʻo, hoʻoholo ihola ʻo ia i kona manaʻo e hele i ka ʻaeʻa, i ʻole e ʻike aku i ka maka o ka mea aloha, a lohe aku hoʻi i nā ʻōlelo hōʻoniʻoni a ke aikāne e pili ana nona a me ka wahine a lāua āna i aloha ai.

ʻAʻole i lilo kēia mau hana aloha ʻole a ka wahine iā ia, i mea nona e huhū ai, akā ua nānā aku ʻo ia i ka wahine me ka puʻuwai i piha i ke aloha, a me ka makeʻe no kona mau ʻano maikaʻi, a ua ulu nō i loko ona ka manaʻo, na kona makuahōnōwai nō kēia mau hana hoʻomoemoe, a me kēia aikāne hulumanu (aikāne ʻoiaiʻo ʻole) wekaweka.

Iā ia e noha ana me nā aikāne a lāua, ke mau nei ka paʻa o kona manaʻo e hele i ka ʻaeʻa.

I kekahi lā hele akula lāua i ka lawaiʻa me ke kāne aikāne, a loaʻa nō hoʻi ka iʻa, hoʻi maila a hiki i ka hale, hoʻā ke ahi, pūlehu ka iʻa a moʻa. Iā lākou nei i mākaukau ai e ʻai, ia wā i hū mai ai ke aloha o ka wahine, na ka waimaka nō e hele, hopu ihola i ka iʻa a hoʻopā aʻela i ka waha, a waiho hou ihola i ke pā, noho ihola kēia nāna.

ʻĪ maila nā aikāne: "ʻUʻumi ke aloha, ʻai iho a māʻona kākou, a laila piʻi aku au i uka e kiʻi kuʻu aikāne, e hoʻi mai i kai nei."

ʻŌlelo akula ke kāne: "ʻAe, e ʻai ʻoe a māʻona, a haʻi aku ʻoe i wahi iʻa na ko aikāne, a lawe pū aku ʻoe me kēia wahi iʻa aʻu i hoʻopā aʻe nei i ka waha i ka laepoʻo, a nāna hoʻi e ʻai aku, ua māʻona aʻe la nō hoʻi au i kona aloha, a hui aku ʻoe me ia hāʻawi aku i ke aloha."

Pau ka ʻai ʻana, liuliu aʻela ka wahine e piʻi e ʻike i ke aikāne.

A hala kēia, ua hoʻomākaukau ihola kēia kāne i kona mau wahi pono āpau i loko o ka paiki ʻili hinuhinu o ia mau lā.

I ka ʻike ʻana mai o ke kāne aikāne i kēia liuliu ona, ʻōlelo maila ʻo ia me ka manaʻo aloha i kā lāua kāne aikāne:

"He paiki aha kēia e hoʻomākaukau mai nei?

"E hele ana au," wahi āna.

"He aha ka mea e hele ai? Noho iho nō kāua a eia nō kā kāua wahine ʻo ke aikāne a ʻolua."

ʻŌlelo akula ʻo ia i kona hoa aikāne: "ʻAʻole paha ʻo kāu mea i ʻimi ai a loaʻa, i kou lā kanaka uʻi, ʻo ia kā kāua e ʻai like ai? Ua haʻalele maila nō ka wahine a kāua iaʻu, e aho e hele, ʻanoʻai o loaʻa aku nō hoʻi ke kōkoʻolua i ke alahele.

"I noho hoʻi ʻoe a hoʻi mai kēlā, hāʻawi aku i ke aloha iā ia, eia au ke hele nei, ʻanoʻai o hoʻi hou mai nō hoʻi i ka ʻāina nei, hui hou nō kākou, a ma ka leka nō naʻe e hui ai."

I ka pau ʻana o kēia mau ʻōlelo, ʻo kona kaha maila nō ia hele no Hilo, kahi e loaʻa ai ka moku. A hiki ʻo ia i kahi o ka ʻohana, ua lohe ka ʻohana i ko lāua kaʻawale me ka wahine, o kekahi inoa makuahine kai ʻōlelo mai iā ia: "Noho iho kāua i Hilo nei, eia iho nō ka wahine i ka ʻāina nei, a mai hele ʻoe i Oʻahu."

ʻĪ akula kēia: "Mai ʻauʻa ʻoe iaʻu, e hele au e ʻike i ka huikau o ke kaona e kaulana nei, aia a kō kuʻu manaʻo aʻu i ʻupu ai e hele, he mea hoʻi wale ʻia mai nō ka ʻāina.

Pane maila kekahi makua kāne ʻohana: "Eia iho nō paha ka huikau o ke kaona i kai o Piʻihonua, kahi e heʻe ai nā pā-lau lena a ka moani, noho iho e ke keiki, ʻo ke kanaka uʻi auaneʻi kēnā e nele ai o ka loaʻa o ka mea maikaʻi, eia nō i nā lā ʻōpio, no laila mai hele ʻoe e ke keiki, noho iho kāua a aei mai ka nalu haʻi o Kāwili, a laila hele aku kāua i ka hehi puʻeone o Waiolama, hihia aku ka ihu o ke kala ʻōhono i ka ʻupena pāʻouʻou o Makua, halalaʻa Puna i ke ahi a ka wahine."

He mau ʻōlelo hoʻolanalana kēia a kēia makua kāne, ʻaʻole naʻe ia noʻonoʻo i loko o kēia keiki.

I ke kū ʻana mai o ka moku, ua hoʻomākaukau ihola ʻo ia no ka hele, i ka lā holo o ka moku ua kau maila ʻo ia he ʻōhua moku, a hiki ʻo ia i Honolulu nei, ʻike ihola i nā mea āna i lohe wale ai nō, a me kekahi ʻohana paha ona, kona hale kamaʻāīna, i ʻupu mai ai e holo i Oʻahu nei.

I luna naʻe o ka moku, i hui ai ʻo ia me kekahi keiki o Honolulu nei, a hoʻokamaʻāina.

He moku peʻa ka moku o ia mau lā, a he mau lā, a he pule a ʻoi, a laila kū mai i ʻaneʻi, mamuli o ka lōʻihi o ia mau lā, ua hoʻaikāne ihola lāua.

A kū ka moku i ka uapo, hoʻi akula lāua no kahi o kēia hale kipa hou ona, i ʻaneʻi o Koleaka, kahi noho o kona hale kipa o ke ʻano nō o kuaʻāina, e ʻike i ka mea hou o kēia wahi, ua hele lāua e mākaʻikaʻi i ka nunuʻa kānaka o ka Nekina, i ka huikau o Polelewa, a ʻike hoʻi iā:

Nani wale ka pua i Honolulu,

Kīkiʻipau nei ke kaona,

Pulu i ka hunawai piula,

Me ka lihilihi o pua rose.

Honi aku au o ke onaona,

Ke ʻala e māpu i ka poli,

Lawe aʻe ʻoe a kiʻekiʻe,

Kau i ka hale ipukukui.

E kuhi ana nō paha ʻoe,

No uka au o ka Lihilou,

Kainō ua ʻike aʻe ʻoe,

I koʻu helu e kau ana.

Pā iho pā aʻe pā mai,

Haʻalulu ke kahua maika.

I loko o kēia mau luhiehu āpau, ʻaʻole ia he mea e kaʻawale ʻaʻe ai ke aloha o ka wahine.

I ka ʻauwinalā Pōʻaono, ʻōlelo maila ke aikāne: "ʻE iho paha kāua i kai o ʻUlakoheo, i ka mākeke, ua piha akula kēia lā i nā kānaka."

"ʻAe, e iho ʻiʻo kāua i laila."

Mākaukau lāua nei, a iho akula. Iā lāua i hiki aku ai, ua hele nō hoʻi nā kānaka a popoʻi, lohe akula kēia i ka leo oli hoʻāeae o kekahi mea, ʻaʻole naʻe ʻo ia nei ʻike aku i ke kino, no ka mea ua hele a piha pū ia wahi.

Iā lāua e neʻeneʻe aku nei i mua, ʻike akula kēia i ka mea e olioli hoʻāeae nei, he wahi kanaka pīlalahi wale nō, he aʻiaʻi kahi ʻili, ua anae maeʻa naʻe i ka ʻawa, ʻike akula ʻo ia i kēia wahine i ka hele ʻana mai me ka huihui iʻa a hoʻokomo ihola i loko o ka ʻie e kau ana ma ke kihi o ke pākaukau a kēia kanaka e kū nei e oli, a ʻonou maila kona lima i mua i ke kanaka oli, ʻaʻole naʻe kēia i ʻike aku he aha lā ia mea.

Ia wā i oli hou mai ai ua wahi kanaka nei i kēia mau lālani mele:

Hele mai kuʻu aloha lā a nui,

A Līhuʻe a Kaʻala lā hoʻi mai,

A ka lana i ka wai o Kuene lā noho ana,

A pule e a Mālamanui hoʻi mai kuʻu aloha.

I ka wā a kēia mea e oli nei ua paila maila ke aloha o ka wahine i loko ona, ke hoʻonalonalo wale lā nō ʻo ia, ke ʻike maila naʻe ke aikāne i kona ʻano uē, nīnau maila ke aikāne, "Eā, ʻeha ʻoe?"

"ʻAʻole," wahi āna.

"He aha lā kā hoʻi kēia ou aʻu e ʻike aku nei? Me he mea lā, ua loaʻa ʻoe i ka maʻi e ʻuʻumi nei i ka waimaka."

"ʻAʻole, e aloha aʻe ana au i ka wahine a kāua, e noho maila i ka ʻāina me ke kāne hou, ʻo ia ke kumu o koʻu ʻano ʻē. No laila e hoʻokuʻu mai hoʻi ʻoe iaʻu e hele aʻe au e ʻike i kēlā kanaka."

Hele akula ʻo ia kūʻai i kēlā iʻa, kēia iʻa a kū nā huihui, ʻo ka uhu, ka ʻanae, ka ʻōʻio, lawe akula kēia a hiki ma kahi a ke kanaka oli e kū nei, pau nō hoʻi kā ia la oli ʻana, ʻōlelo akula kēia:

"Eia ko iʻa," hoʻokomo ihola i loko o ke ʻie, piha i ka iʻa, a pane maila ʻo Kū (ka inoa o ka mea oli): "Ua nui maila ka iʻa iā ʻoe, he ʻai ko uka o Mānoa, e hoʻi kāua i koʻu wahi!"

"ʻAe," wahi a ia nei.

Haele akula lāua nei no ka hale kūʻai ʻawa ma uka mai o ka mākeke, a loaʻa nā hili ʻawa, hoʻi akula no ke kula o Kahuʻa a hiki i uka o Mānoa, kahi o kona kamaʻāina hou e hele pū nei.

ʻIke maila ko ka hale poʻe; he malihini, ʻeleu maila kamaʻāina; hopu ka moa hana a kū i ka ipu hao, hana nō hoʻi ka iʻa, mama ka ʻawa.

ʻOiai naʻe ʻo Kū e noho nei ma kāna malihini ʻōpiopio, ʻōlelo akula ʻo ia iā Kū, kona kamaʻāina:

"Eia kā e ʻike ana iā Mānoa nei, e ʻole ʻoe ʻike ana au i kēia wahi."

"ʻAe," wahi a kona kamaʻāina, "ua ʻike ihola ʻoe i ka hale, i noho a hele mai, inā ʻaʻole au o ka hale nei, eia nō ka wahine a kāua, he hale kipa nou a me aʻu, a moe kāua, ʻike ihola ʻoe e ke aikāne, i ka ʻāina i kaulana i ka ua liʻiliʻi," ia wā i olioli hou mai ai ʻo Kū i kēia mele:

Kuʻu wahine i ke kula loa lā o Kahuʻa,

Mai ka ua liʻiliʻi o Mānoa,

Ke līhau mai lā i ke aho o ke kuikui I kuhi nō au he ʻehu kai no Māmala,

He ʻāina i ka ihu o ka moku,

A moku mai ka pawa o ke ao ala aʻe ʻoe,

E ala aʻe kāua ua ao ʻeā,

Ua puka ka lā puka ke kānāwai,

A puka mai nō he mea hilahila,

I kaulana ai nā lehua i Nuʻuanu.

ʻOiai ʻo Kū e pa-heahe nei i kēia mau lālani mele, ʻike maila ʻo ia i kāna malihini, ua hele a pō i ka ʻula a nīnau maila ʻo ia: "He aha kēia ʻano ʻē e hele nei a hāloʻi ka wai o ka maka?"

"E aloha aʻe ana au i ka wahine a kāua, e noho maila i ka ʻāina," wahi a ka malihini.

"Aia i hea?" wahi a Kū.

"Aia nō i Hawaiʻi o Puna."

"A laila no Puna ʻoe?"

"ʻAe, ʻo koʻu wahi ia."

"He aha nō hoʻi ka mea hele pū ʻole mai me ka wahine i ka huakaʻi hele?"

"Ua lilo i ke kāne hou," wahi a ke aikāne, "a no ke aloha i ka wahine, o ia ke kumu o koʻu hele ʻana mai i Oʻahu nei a hui ihola kāua. ʻO ko leʻa i ke oli, ke kumu o kuʻu hahai ʻana mai nei iā ʻoe a hale kipa ihola kāua."

"Ua hiki," wahi a Kū, "noho iho kāua i Mānoa nei, aʻo aku au iā ʻoe i ke oli, a ʻike ʻoe, a laila haku aku au i mele no ka wahine a kāua a paʻa, a laila ʻoe hoʻi a ko wahine, ke lohe ʻo ia i ke mele ona, ʻo ka lāʻau puhipuhi ihola nō ia nāna e hoʻihoʻi mai i ko wahine."

Ua noho kēia keiki me Kū i uka o Mānoa, aʻo i ke oli a ʻike, haku ʻo Kū i kēia mele ma luna aʻe, e like me ka moʻolelo a kēia keiki i hahaʻi ai.

ʻO nā lālani mua o ke mele e hōʻike ana nō ia i ka uʻi a me ke ʻano maikaʻi o kāna wahine, pēlā nō ʻo ia i aloha ai, a ma lalo mai nā ʻōlelo ʻawaʻawa a ka makuahōnōwai a me kahi aikāne hulumanu āna, a ma waena, nā ʻōlelo hoʻohilahila i kahi punalua aikāne, inā ʻaʻole kāna wahine, inā ʻaʻole ʻo ia e ʻike i ka papa lohi o ʻĀpua, a ma lalo loa nō hoʻi nā ʻōlelo hoʻohaʻahaʻa no ka punalua, ʻaʻole ʻo ia i kūpono i aliʻi no ka moku, akā he kela kona kūlana kūpono.

Mamuli o kēia mele i hoʻi hou ai kēia mau mea a noho he kāne a wahine, a hiki i ka uhi ʻana o kapa ʻeleʻele, kau ka puaʻa i ka nuku.

KĪLAU PALI