Digital Collections
Celebrating the breadth and depth of Hawaiian knowledge. Amplifying Pacific voices of resiliency and hope. Recording the wisdom of past and present to help shape our future.
He Inoa no Kamakaleiakawainui
Kahikina de Silva
Aia paha ka pani o kēia ‘āhui ‘ōlelo i ka mo‘olelo ‘o "Makalei ka Laau Pii Ona a ka Ia o Moa-Ula-Nui-Akea i Kaulana" a Sam Keko‘owai i pa‘i ai ma ka nūpepa Kuokoa, M.H. 1922–1924. ‘O ka me‘e o ia mo‘olelo, ‘o ia kahi keiki piha ‘eu no Makawao, Maunawili, Kailua, Ko‘olaupoko, O‘ahu, nona ka inoa ‘o Kahinihini‘ula; ‘o Niula ke kupunawahine, ‘o Haumea ke akua, ‘o Mākālei ka melomelo e ‘ume ai.
Auhea wale oe Kahinihiniula
Kahi keiki eueu ao Makawao
Aia paha i ka paani kamalii
Peepee aku i ka ulu naupaka
Ike ole ia i ka puahiohio
E na hoahele o ka ahuula
Hookamaaina i ka nalu opuu
Kau aheahe i ka ilikai
Maloo ka ili o ke kamaaina
Lalilali ole i ke awakea
He leo kauoha na Niula
O ke aloha ia o ke kupuna
"Eia ko kupunawahine,
Hii no oe ia ia ma mua o ke alo."
Uhoi kaua me ka nepu anae
I ka punawai ola o ka tutu.
He inoa no Kamakaleiakawainui.
© Kahikina de Silva 2005
“12.30.2005, Mauli, Makalii”
photo credit: Forest & Kim Starr
"E iho kaua ilalo o Halauwai, i ike mai i ka Mokila ula i ka wai, ka hoololohe wai o Moaulanuiakea" wahi a Niula i ‘ōlelo ai i kāna mo‘opuna iā Kahinihinu‘ula. ‘O ka mōkila ‘ula kahi inoa kapakapa no ke kino malū, kino palai‘ula, o ka Mākālei e pe‘e ana i ka ‘ōpū palai ma ka‘e o ke kū‘ono hālua ‘o Hālauwai, Maunawili.