Ēwelei‘ulaikalaniākea He Inoa

Manu Boyd

No Ēwelei‘ulaikalaniākea Aulani Wong, ke kamalei a Sterling Kini Wong lāua ‘o Lu‘ukia Archer, i hānau ‘ia i ka lā 19 o Ianuali 2005. Ua haku ‘ia a pa‘a me ke aloha a me ka ha‘aheo pū na Manu Boyd, 20 Ianuali 2005.

‘Auhea wale ‘oe e ke kini a ke kēhau
I lulu‘u ihola i ke oho o ke pili
Pili mai ka hali‘a ho‘ohihi i laila
I ke kupu mai o ka uluwehi i ke anu
‘O ke keu nō ia o ka ha‘aheo ē
Ia pua alo la‘i noho i ka mālie
Ua ao ka ‘ōpua i ka wena o ka lani
E heahea ana i ke kamalei i hiki mai
Maika‘i ka hanu ‘ala anuhea i ka ihu
Ke onaona e moani a‘e ana i ke ahe
A he nani ka ‘ōnohi maka ‘ālohilohi
Me he pua u‘i loa o ke ko‘oloa‘ula
Ki‘ina ‘ia kou lei i ka wēkiu
I wehi kāhiko no ke ao mālamalama
Mālama ‘ia iho ‘oe i nā kau a kau
Ma ka pūliki maluhia o nā mākua ou
He ho‘oheno kēia no ka pua alo la‘i
Ēwelei‘ulaikalaniākea he inoa
E ō mai . . .

For the brand-new daughter of Sterling Kini and Lu‘ukia Archer Wong, born 19 January 2005.

Where are you, O blanketing mist
That brings repose to the pili grass
A thought comes to mind, transporting me there
To the verdant grove, sprouting in the cool morning air
She is the epitome of pride
This serene blossom that dwells in the calm
The clouds awaken in rich, pink hues
Heralding the arrival of the beloved child
Pleasant to breathe is this cool fragrance
A sweetness carried gently on the breeze
Beautiful eyes sparkle with delight
Like the unequaled splendor of the ko‘oloa‘ula
Your lei is brought forth from the lofty heights
As an adornment to be worn in the brilliance of day
You will always be well cared for
In the protecting embrace of your loving parents
This is a song of affection for the serene blossom
Ēwelei‘ulaikalaniākea is your name
Answer . . .

© Manu Boyd, 2005